Віктар Бабарыка ў Бруселі прэзентаваў сваю партыю «Разам»

Сваю партыю «Разам» Віктар Бабарыка прадставіў 4 сакавіка на Міжпартыйным форуме «8+100», які адбываецца ў Еўрапарламенце, паведамляе Белсат.

У сваім выступленні Бабарыка адзначыў, як цяжка было беларусам «заставацца на парадку дня еўрапейскай палітыкі і быць часткай еўрапейскай сям’і», асабліва тады, калі можна было пачуць пра тое, што «вы – суагрэсары, з краіны, якая пачала вайну супраць свабоды».

— Але я думаю, што рэжым – гэта не [простыя.– Рэд.] людзі. Беларусы не падтрымліваюць гэты рэжым. І калі я быў у турме, шмат людзей, палітычных і не толькі палітычных зняволеных, казалі, што яны не падтрымліваюць гэтую вайну, – заўважыў Бабарыка.

Ён сказаў, што зараз са сваёй партыяй «Разам» думае, што можна зрабіць, каб палепшыць гэтую сітуацыю, і назваў тры асноўныя кірункі працы, на якіх варта сканцэнтраваць свае намаганні.

— Першы: мы павінны працаваць, каб вызваліць усіх зняволеных. Усе згодныя з гэтым. Другі: мы павінны спыніць план стварэння зняволеных, палітзняволеных. Трэці, вельмі, вельмі складаны: як прымусіць еўрапейскія партыі, еўрапейскія ўрады паверыць, што беларусы... што беларускі народ – гэта не рэжым. І таксама, што Беларусь – гэта адна з частак бяспекі Еўропы, – адзначыў Віктар Бабарыка.

Ён заўважыў, што зараз важна ўкласці ў галовы еўрапейскіх палітыкаў і кіраўнікоў урадаў, што Беларусь павінна быць часткай Еўропы, бо гэта «не толькі наша свабода, гэта бяспека Еўропы». Бо 40 гадоў таму ў Беларусі здарылася чарнобыльская катастрофа, а зараз адбылася іншая, «грамадзянская катастрофа», і Беларусь і Украіна – частка гэтай катастрофы.

— І таму я думаю, што для нас вельмі важна стварыць новую сувязь паміж Украінай і Беларуссю… Мы павінны разарваць прывязку Беларусі да Расеі. І абсалютна ўпэўнены, што мы можам гэта зрабіць. І мы спрабуем зрабіць усё неабходнае, каб гэта адбылося», – сказаў Віктар Бабарыка, скончыўшы сваю прамову словамі «Жыве Беларусь!».

На форуме прысутнічалі таксама прадстаўнікі дзевяці беларускіх дэмакратычных партый, якія былі знішчаныя рэжымам Аляксандра Лукашэнкі пасля падзеяў 2020 году. 

***

Пазней у інтэрв’ю Люстэрку палітык удакладніў, што адносна партыі яшчэ ідзе «працэс абмеркавання з аднадумцамі» і канчатковае рашэнне аб лёсе структуры яшчэ не прынятае.